Ohan jiji le onukplaxwe
Le nyɔwlan nyɔxlɛ we akpa ji, kpodo alɔgɔtɔ míatɔnye xeye ni nyi Wycliffe-Benɛ, kpodo SIL Togo-Benɛ kpo, mí kpewu wasi wema xeni na kpedo ɛmɛ xeye ni nyɔ flasegbe xixlɛ kpo winwlan ye wu, na yee can a do nyɔ saxwɛgbe winwlan kpodo xixlɛ. Mí mɔ wasi wema bu do saxwɛgbe mɛ. Wema mɛ la na kpedo ɛmɛ xeye ni ɔn do afɔ sukluxɔ mɛ kpɔn ye wu, na yee can a do nyɔ saxwɛgbe winwlan a bo nyɔ xixlɛ. Akɔnŋuta wema ɖe can mɔ bo do wema mɛ la wu, na ɛmɛ mɛ laye.
Kpodo wema xena ɛmɛ xeye ni se flasegbe na zan la, mí kplan onu gbɛtɔ 121, ye bo nyɔ saxwɛgbe xixlɛ, bo nyɔ winwlan. Akɔnŋuta wema kpodo nyɔwlan nyɔxlɛ we wema la, na na ɛgbɛtɔ 101 xeye ni ɔn yi flasegbe suklu kpɔn ye, kpewu bo nyɔ saxwɛgbe winwlan kpodo xixlɛ kpo fifi.
Wema hamɛ-hamɛ buye can mɔ nyi wiwasi, a do kpedo ɛmɛ xeye ni kplan nyɔwlan nyɔxlɛ ye wu, na ye a do xlɛ onu nɔ le ogan ɖekpekpe mɛ. Le omɔ mɛ la nu, mí wasi wema atun xeye : Dindɛnye, olodidoye, ajodidoye, akɔtanu saxwɛnuyetɔn, onu jɔ do ɛmɛ ji we gbexoye, walɔ nyanyla xeye ni ɖo na gu ye we gbexo, onuɖexlɛ ɛmɛ we gbexoye, kpodo onukplan-ɛmɛ we gbexoye.
Onu xixlɛ do saxwɛgbe mɛ kpinkplan
Na mi o nyɔ flasegbe xixlɛ, mi byɔ sɔn mia si nɔ tun miye boo xlɛ wema xeni nyi : Nyɔwlan nyɔxlɛ do saxwɛgbe mɛ, na mi a do yawu nyɔ saxwɛgbe winwlan kpodo xixlɛ. Mi na kpewu xlɛ le omɔ miatɔn we nukpwɛn mɛ. E mɔ le do wema xena ye na zin le omɔ mɛ ji, mi bo na kpewu hun-i, a bo xlɛ-ɛ.
Onu winwlanye:
Na do nyi onuxlɛtɔ adodwe, ye ɖo na nɔ xlɛ onu eji-eji. A do xlɛ onu nywɛɖe, ye ɖo na xlɛ onu susu le ogan ɖekpekpe mɛ. Do e mɛ la wu azanwema 2012, 2013 kpo 2014 can le e mɛ. Xojɔxo, azanwema oxwe xeni va yi tɔn ye ɔn mɔ hyan na onu ɖe. Vɔ ganke, azanwema 2013 kpo 2014 ɖo onu xixlɛ ɖeye xeni na do jijwɛ na mi.
